2023-05-13 Jeonbuk Asia Pacific Masters Games
376 376 people viewed this event.
運動員生涯可以去到幾多歲?其實呢個問題係冇答案,因為好睇你心態!
Doon Sir 由12 歲開始比賽,到今年39歲已經比賽了27年,佢已經遠離了所謂「最好狀態」年紀好遠,一般比賽都係 18+ 一組,所以佢係比賽場的成績已經大不如前。
「Master」呢個字一向在香港黎講係「貶義」比較多,因為香港未太接受到「老人家比賽」,不過外國所謂 master 比賽其實由 30歲開始已經係喇!
Doon Sir 近年已經轉戰馬拉松賽事,而今次出戰的「 2023 Jeonbuk Asia Pacific Masters Games」更係世界認可的「Master game」,有如大家熟悉的奧運會,4年一屆同有各類唔同運動,唔同的是參戰的只有「master」,而大部份之前都係運動員。
好多媒體都問過 Doon Sir 究竟會比賽到幾時?到今時今日都仲比賽,究竟係愛?係責任?定唔服輸?
我地其實有個答案。
Doon Sir:「我會一路比賽到冇比賽俾我參加為止,我 keep 住比賽因為對鞋係我最好朋友,想繼續同佢出戰。英雄都有老的一日, 更何況我只係普通人,我明白現實好難在大型比賽仲有乜好成績,不過仲有好多比賽可以俾我玩!
心態決定一切,有比賽先會 keep 住 update,先會有動力同新技術去教學生。我對鞋係我最好朋友,學生就有如仔女,大賽就由接班人去打,我就繼續去唔同比賽唔同地方開路等佢地行得順D,而我都由場地賽轉戰咗 去marathon,應該仲有排玩同現在都有唔錯成績,起碼我馬拉松可以攞到歐洲第6
。
所以我沒有所謂”退”的一日,因為只要唔怕輸,就總有比賽可以參加,的確有D比賽已經攞唔到入場券又或者同以前的成績有好大距離,不過我就冇所謂,心態決定一切,我對呢個運動的熱愛、認真、唔放棄心態同所有嘅付出過的努力就係對學生最好的身教。呢D比我以前有乜獎,有幾多個冠軍,去過邊度比賽等等都重要!今年其實我有大計劃,不過突然殺出一個master game,好唔習慣冇準備嘅情況之下出戰, 不過心諗今次可以同差唔多年齡嘅人比賽, 點都要去試一試! 希望爛船都有三分釘!
」
星期六、日 Doon Sir 就會出戰 500m, 1000m 同 2000m場地賽,今年 Doon Sir 冇時間放在場地,而佢 target 都唔係呢個比賽 (佢練咗成年去為咗之後一個比賽,係乜到時先講),不過都睇下今次同D「老」朋友比賽有冇乜驚喜啦!